Të dashur studentë,

Mirësevini në Universitetin "LUARASI". Në themelet e tij unë kam vene shpirtin tim, kurse ju besimin dhe mundin tuaj.

Çelja e këtij universiteti ka qenë një ëndërr e imja e hershme që u bë e mundur në vitin 2003, në kushtet e reja që u krijuan në Shqipëri pas kthesës demokratike. Dëshira ime ishte të krijoja një universitet në traditat e shkollës shqipe, kombëtare dhe laike.

Tashme Universiteti "LUARASI" është një realitet në zhvillim. Ambicia ime është të krijoj një universitet cilësor, të krahasueshëm me ato të vendeve të zhvilluara perëndimore, me mjedise moderne e komode, me teknologji të përparuar, me profesorat të kualifikuar dhe literature të pasur. Në fund të fundit, ne së bashku, vumë gurët e themelit. Gjeneratat e reja do ta cojnë më tej këtë nismë.

Për shkak të vështirësive të njohura, që u krijuan në vendin tone gjatë periudhës së tranzicionit, shume njerëz na njohin në botë si një popull refugjatësh, të aftë për të bërë punë të rëndomta. Unë, me bashkëpunëtorët e mij, me stafin akademik dhe me studentët, dëshiroj t'i provojmë botës se shqiptarët janë të aftë, jo vetëm për punë të thjeshta, por të themelojne universitete cilësore, të ngjitin shkallët e dijes dhe të shkencës, njësoj si popujt e tjerë të përparuar.

Në botë ka shumë universitete të vjetër dhe cilësorë që janë produkt i historisë njerëzore. Varfëria dhe prapambetja jonë e përkohshme janë, gjithashtu, produkt i historisë së vendit tonë. Por populli ynë i mëncur na ka mësuar të kemi si virtyt trimërine, të mos tutemi dhe të sulmojmë majat. Në fund të fundit ne duhet të krijojmë shkollat tona shumë të mira dhe të mos lejojmë largimin e mendjes nga Shqipëria, që përbën një pasuri kombëtare. Ne nuk mund të shkojmë të gjithë jashtë shtetit si refugjatë për të punuar dhe për të studiuar. Detyra jonë si qytetarë dhe si patriotë është ta begatojme Shqipërinë me pasuri dhe me dije.

Unë ndjek me vemendje cdo hap që bëni ju përpara dhe gëzohem kur shoh se si rriteni para syve të mij. Qysh ne muajt e pare të shkollës ju filloni të flisni si juristë, të mësoni terminologjinë fillestare të shkencave juridike, më vonë i thelloni dijet në fushën penale apo civile dhe jam i sigurt, se shume nga ju, do të arrini majat, kur të dilni në jetë .Bashkë me ju rritet dhe Universiteti "LUARASI"; ai shtohet me studentë të rinj, me profesorat, me tekste juridike, me mjedise dhe teknologji të reja dhe moderne.

Në qoftë se gjatë karrierës sime të gjatë si profesor i së drejtes kam arritur ndonjë sukses, këtë ja kushtoj dashurisë dhe respektit që kam patur për studentët. Ata ma kanë shpërblyer në të njëjtën mënyrë. Shpërblimi dhe gëzimi më i madh për mua është kur dëgjoj studentët të pohojne se "Ne vijme me gëzim dhe kënaqësi në këtë shkollë".

Prof. Dr. Aleks LUARASI
Themelues dhe drejtues i Universitetit "LUARASI"