HYRJE

Procesi mësimor në Fakultetin e Drejtësisë “Luarasi” vazhdon 4 vjet; gjatë kësaj periudhe zhvillohet kursi teorik dhe praktik.

Plani mësimor mbështetet në procesin e Bolonjës. Lëndët zhvillohen me module semestrale dhe studentët vlerësohen me nota dhe me kredite ( European Credit Transfer System - ECTS), të cilat bëjnë të mundur transferimin e studentëve dhe njohen e diplomave brenda dhe jashtë vendit.

Plani mësimor është hartuar duke ruajtur boshtin e lëndëve themelore për formimin teorik të juristëve, të cilat janë pak a shumë të njëjta në fakultetet analoge të universiteteve perëndimore. Numri i përgjithshëm i lëndëve që do të zhvillohen në katër vjet është 64, nga të cilat 40 lëndë të detyrueshme dhe 24 lëndë me zgjedhje. Studenti duhet të fitojë cdo vit akademik 60 kredite ose 4 x 60 = 240 ECTS. Në përfundim studenti diplomohet “Jurist” dhe mund të punësohet në sektorin publik ose privat ose të vazhdojë studime të mëtejshme.

Kurrikula universitare mbështetet jo vetëm në arritjet e shkencave juridike në Shqipëri, por edhe në literaturën e huaj nga vendet perëndimore, të cilat e kanë një sistemi ligjor të ngjashëm me atë shqiptar.

Tekstet në përdorim janë ato të autorëve shqiptarë, të cilat interpretojnë legjislacionin shqiptar dhe praktikën gjyqësore vendase. Krahas tyre, shkolla ofron tekste alternative të përkthyer dhe të botuar në gjuhën shqipe nga “Luarasi University Press” për të plotësuar kulturën universitare dhe për të bërë të mundur ekuivalentimin e diplomës me ato të fakulteteve perëndimore.

Studentët do të thellojnë njohuritë në gjuhët e huaja (anglisht dhe italisht), sidomos në përvetësimin e termave juridike për të mundësuar përdorimin e literaturës profesionale në këto gjuhë.

Në dy vitet e para kanë epërsi lëndët e përgjithshme të formimit teorik të studentëve. Në vitin e tretë dhe të katërt marrin epërsi lëndët ngushtësisht profesionale.

Formimi teorik kombinohet me mësimet praktike. Për këtë qëllim është parashikuar gjatë vitit të katërt prania e studentëve në gjykatë, prokurori, noteri, avokati, në administratën shtetërore, të shoqëruar nga pedagogët përkatës, të cilët shpjegojnë praktikën gjyqësore dhe vlerësojnë dijet e fituara. Praktika gjyqësore u jep mundësi studentëve të fitojnë shprehitë e nevojshme dhe t’i përshtaten lehtësisht tregut të punës.



PLANI MESIMOR

	Hap Planin Mesimor ne nje faqe te re Web!
	Shkarko Planin Mesimor si Dokument Word!